Ат үстіндегі әділ айқас
«Ақ бидай – 2025» VІІІ Республикалық ауыл спорты ойындары аясында Талғар ауданындағы «HORSE AND POLO CLUB» ипподромында көне ұлттық спорт түрлерінің бірі — аударыспақтан тартысты жарыстар өтті. Бұл — ат үстінде батырлық пен шеберлік сынға түсетін спорт түрі.
Жарысқа еліміздің 16 өңірінен ең мықты шабандоз-батырлар қатысып, 8 салмақ дәрежесі бойынша бақ сынады.
Аударыспақтағы негізгі мақсат — қарсыласты ер-тоқымнан аударып түсіру, сонымен бірге тұлпарды да толық бақылауда ұстау. Ұйымдастырушылар бұл сайыстың ұлттық дәстүрлерді сақтау мен насихаттаудағы маңызды рөлін ерекше атап өтті.
— Аударыспақ жарыстары спорттық бағдарламаның шынайы сәніне айналды. Көрермендер үшін ұмытылмас сәттер сыйлады. Біз ұлттық спорт түрлерінің «Ақ бидай» ойындарындағы лайықты орнымен мақтанамыз. Олар ұрпақтар сабақтастығын нығайтып, жастардың бойына отансүйгіштік рухты қалыптастырады. Мұндай жарыстар денсаулықпен қатар, мәдени болмысымызды да күшейтеді, — деді Алматы облысы бойынша ұлттық және ат спорты түрлері орталығының аға әдіскері Ұмыт Балақан.
Тартысты белдесулерде спортшылар шынайы күш, ептілік пен ат үстінде күрес жүргізу шеберлігін көрсетті. Жанкүйерлер белдесу тағдыры соңғы секундтарда шешілген сәттерге куә болды.
Жарыс қорытындысы бойынша әр салмақ дәрежесінде жеңімпаздар анықталып, облыстық құрама қоржынына медальдар енді. Алматы облысының жүлдегер спортшылары:
🏅 Тезекбаев Мұратәлі (94 кг – 1 орын)
🥉 Қайыржан Бекболат (57 кг – 3 орын)
🥉 Қайрат Абдусабыр (68 кг – 3 орын)
🥉 Әбетай Сұңғат (100 кг – 3 орын)
— Аударыспақпен үш жылдан бері айналысып келемін. Алғаш көкпардан бастадым. Осындай үлкен деңгейдегі жарыстарға қатысу — мен үшін үлкен мәртебе. Бұл – өз күшімізді дәлелдеп, туған өлкемізді таныту мүмкіндігі. Алдағы уақытта да дамып, жаңа жарыстарға қатысқым келеді. Ең бастысы – ұлттық спорт түрлері өміршең болып, жастарды рухтандыра берсе екен, — дейді Мұратәлі Тезекбаев, жарыс жеңімпазы.
Командалық есеп бойынша:
🥇 1 орын – Түркістан облысы
🥈 2 орын – Батыс Қазақстан облысы
🥉 3 орын – Алматы облысы
Ертең қатысушылар мен қонақтарды жаңа жарыстар күтіп тұр. Бағдарлама жалғасады, ал спортшылар тағы да күш-жігері мен спортқа деген адалдығын дәлелдемек.
